मुंबई (२४ जून): महाराष्ट्र सरकारने तीन भाषांच्या धोरणावर बैठका घेण्यास सुरुवात केल्यावर शिवसेना (उद्धव बाळासाहेब ठाकरे) पक्षाचे खासदार संजय राऊत यांनी तीव्र नाराजी व्यक्त केली आहे. त्यांनी म्हटले की, “या बैठका म्हणजेच मराठी भाषेचा थेट अपमान आहे. राज्याच्या अस्मितेशी खेळणं थांबवावं.”
राऊत यांनी प्रश्न उपस्थित केला की, “राज्य सरकारने तीन भाषांचा फॉर्म्युला राबवण्यासाठी घेतलेल्या बैठका कोणत्या हेतूनं घेतल्या जात आहेत? मराठी ही राज्यभाषा असूनही तिच्या अस्तित्वावरच प्रश्न निर्माण होतो आहे.”
त्यांनी हेही नमूद केले की अनेक मराठी साहित्यिक आणि सेलिब्रिटी या मुद्द्यावर शांत का आहेत? “काही लोक सरकारच्या जवळ असल्यामुळे मराठीच्या संरक्षणासाठी पुढे येत नाहीत. हे दुर्दैवी आहे,” असं त्यांनी स्पष्टपणे सांगितलं.
संजय राऊत यांनी दावा केला की, अनेक मंत्री आणि नामांकित व्यक्तींची मुलं इंग्रजी माध्यमात शिक्षण घेतात. “जे स्वतःच्या घरात मराठी वापरत नाहीत, त्यांना समाजाला मराठीचं महत्त्व सांगण्याचा नैतिक अधिकारच नाही,” असा आरोप त्यांनी केला.
मराठी भाषा ही फक्त अभिमानाची बाब नाही, तर आपली ओळख आहे. शासनाने तीन भाषांचा अभ्यास करताना मराठीचा दर्जा आणि स्थान डावलू नये, अशी मागणी त्यांनी केली.
राजकीय, सामाजिक आणि सांस्कृतिक क्षेत्रातील अनेक व्यक्तींनी यावर उघडपणे भूमिका घेणं गरजेचं असल्याचं राऊत यांनी ठामपणे सांगितलं.
