पुणे, २२ जुलै २०२५: कोंधवा परिसरात एका महिलेसोबत डिलिव्हरी बॉयने बलात्कार केला, असा आरोप करणाऱ्या २२ वर्षीय IT क्षेत्रातील महिलेविरुद्धच पुणे पोलिसांनी खोटी माहिती देणे आणि बनावट पुरावे तयार केल्याप्रकरणी ‘नॉन कॉग्निझेबल’ गुन्हा दाखल केला आहे.
पोलिसांच्या तपासानुसार, महिलेने दिलेली माहिती खोटी असून, ती ज्या व्यक्तीवर आरोप करत होती तो तिचा परिचित २५ वर्षीय युवक होता. पोलिसांनी स्पष्ट केलं की, फ्लॅटमध्ये जबरदस्तीने प्रवेश केल्याचे कोणतेही पुरावे मिळाले नाहीत, तसेच महिलेवर कोणताही रसायन फवारल्याचा दावाही खोटा ठरला.
हा गुन्हा ‘नॉन-कॉग्निझेबल’ स्वरूपाचा असल्याने पोलिसांनी संबंधित महिलेला नोटीस बजावली असून, तिला चौकशीसाठी उपस्थित राहण्याचे आदेश दिले आहेत.
या प्रकरणामुळे गंभीर स्वरूपाच्या आरोपांचा गैरवापर आणि खोट्या तक्रारींमुळे पोलिस यंत्रणेवर व न्याय प्रक्रियेवर होणारा ताण पुन्हा एकदा चर्चेत आला आहे. पुणे पोलिसांनी नागरिकांना अशा प्रकारच्या खोट्या तक्रारी टाळण्याचे आवाहन केले असून, खोटा आरोप करणे हे स्वतः एक गंभीर गुन्हा आहे, याची जाणीव ठेवण्याचे सांगितले आहे.
