हिंजवडीत गेल्या महिन्यात झालेल्या जोरदार पावसामुळे पूरपरिस्थिती निर्माण झाली होती. प्रमुख रस्ते जलमय झाले होते आणि अनेक वाहने अडकली होती. त्यामुळे नागरिक आणि आयटी पार्कमध्ये काम करणाऱ्या नोकरदारांचे मोठे हाल झाले. या पार्श्वभूमीवर राज्याचे उपमुख्यमंत्री आणि पुण्याचे पालकमंत्री अजित पवार यांनी रविवारी पत्रकार परिषदेत महत्त्वपूर्ण निर्णय जाहीर केला.
पवार यांनी सांगितले की, ओढ्यांवर बांधलेल्या सर्व अनधिकृत इमारती पाडण्याचे आदेश प्रशासनाला देण्यात आले आहेत. तसेच, बुजवलेले ओढे पुन्हा नदीपर्यंत प्रवाहित करण्याचे नियोजन करण्यात आले आहे.
त्यांनी स्पष्ट केले की, “हिंजवडीत किती पाऊस पडतो, किती पाणी साचते, आणि कोणते ओढे बुजवले गेले आहेत, याचे सर्वेक्षण सुरू असून, त्यानुसार कारवाई केली जात आहे.” त्यांनी यासाठी जिल्हाधिकारी, पिंपरी-चिंचवड महापालिका आयुक्त, पीएमआरडीए, जलसंपदा विभाग, सार्वजनिक बांधकाम विभाग आणि औद्योगिक विकास महामंडळ यांना जबाबदारी सोपवली आहे.
जर काही इमारती मोठ्या असतील आणि त्यांना त्वरित पाडणे शक्य नसेल, तर त्यांच्याद्वारे ओढ्यांचे प्रवाह वळवून ते नदीपर्यंत पोहोचवण्याचा पर्यायही प्रशासनाने शोधावा, असे निर्देश त्यांनी दिले.
अजित पवार यांनी आश्वासन दिले की, “गेल्या महिन्यात जशी पूरपरिस्थिती निर्माण झाली होती, तशी परिस्थिती यापुढे निर्माण होणार नाही, यासाठी सर्व उपाययोजना केली जात आहेत.”
हा निर्णय पर्यावरणीय समतोल राखण्यासाठी आणि नागरिकांच्या सुरक्षेसाठी महत्त्वाचा ठरू शकतो.
