नवी दिल्ली (१२ ऑगस्ट): सुप्रीम कोर्टाच्या दिल्लीतील भटक्या कुत्र्यांना पकडून शेल्टर्समध्ये ठेवण्याच्या निर्णयावर बॉलिवूडमधील अनेक सेलिब्रिटींनी नाराजी व्यक्त केली आहे. जाह्नवी कपूर, वरुण धवन, सिद्धार्थ आनंद यांच्यासह अनेक कलाकारांनी या आदेशाला “अमानवीय” आणि “मृत्युदंडासारखा” ठरवले आहे.
सर्वोच्च न्यायालयाने सोमवारी दिल्ली सरकार व महानगरपालिका संस्थांना आदेश दिला की, सर्व भागांमधून भटके कुत्रे पकडून त्यांना आश्रयगृहांमध्ये ठेवावे, आणि कोणीही या प्रक्रियेत अडथळा आणल्यास कठोर कारवाई केली जाईल, असेही कोर्टाने बजावले.
या निर्णयानंतर अनेक कलाकारांनी सोशल मीडियावर तीव्र नाराजी व्यक्त केली. काहींनी असे म्हटले की, “ही केवळ कुत्र्यांची नव्हे, तर मानवी संवेदनशीलतेचीही परीक्षा आहे.”
वरुण धवनने म्हटले, “प्रत्येक जीवाला जगण्याचा अधिकार आहे. भटक्या कुत्र्यांवर असा निर्णय म्हणजे त्यांच्यावर अन्याय करणं आहे.“
जाह्नवी कपूरने सोशल मीडियावर लिहिले, “हे निर्णय त्यांना मारण्यासारखे आहेत. त्यांच्या सुरक्षिततेसाठी मार्ग शोधण्याची गरज आहे, त्यांना दूर लोटण्याची नाही.“
प्राणीमित्र संघटनांनीही या निर्णयावर आक्षेप घेतला असून, सर्वसमावेशक, मानवी आणि शाश्वत उपायांची मागणी केली आहे.
या निर्णयाचा उद्देश शहरातील कुत्र्यांमुळे होणाऱ्या घटनांवर नियंत्रण ठेवणे असले तरी, अनेकांच्या मते हा उपाय संवेदनशीलतेचा अभाव दाखवणारा आहे.
