काठमांडू (9 सप्टेंबर): नेपाळचे दिग्गज नेते केपी शर्मा ओली, ज्यांनी याआधी अनेक सरकारं कोसळवली होती, त्यांनी 2024 मध्ये तिसऱ्यांदा सत्तेची धुरा हाती घेतली, तेव्हा जनतेमध्ये राजकीय स्थिरतेबाबत आशा निर्माण झाली होती. मात्र, त्यांचा कारभार पुन्हा एकदा अस्थिरतेच्या भोवऱ्यात अडकला, आणि ही आशा क्षणभंगुर ठरली.
चीनसमर्थक धोरणांसाठी प्रसिद्ध असलेले ओली, यांना भ्रष्टाचाराविरोधात तरुणांनी छेडलेल्या आंदोलनाच्या पार्श्वभूमीवर, आणि सरकारने लादलेल्या सोशल मीडिया बंदीमुळे वाढलेल्या असंतोषामुळे पदत्याग करावा लागला. या आंदोलनादरम्यान पोलिसांच्या गोळीबारात किमान 19 जणांचा मृत्यू झाला, आणि शेकडो नागरिक जखमी झाले.
73 वर्षीय ओलींच्या पदावरून हटवण्यात आल्यानंतर, नेपाळ पुन्हा एकदा राजकीय अराजकतेच्या मार्गावर आहे. गेल्या 17 वर्षांत देशात 14 सरकारं बदलली आहेत, आणि देशातील सत्तासंघर्ष, अस्थिर आघाड्या व नेतृत्वाचा अभाव हे प्रश्न कायम आहेत.
ओली यांचे कारस्थानप्रधान राजकारण, आंतरराष्ट्रीय धोरणांतील एकतर्फी कल आणि अंतर्गत दबाव हाताळण्यात आलेले अपयश, यामुळे नेपाळच्या जनता पुन्हा एकदा दिशाहीनतेच्या गर्तेत ढकलली गेली आहे.
