काठमांडू, २३ सप्टेंबर – नेपाळच्या नव्या पंतप्रधान सुशिला कर्की यांनी मंगळवारी निवडणूक आयोगाच्या अधिकाऱ्यांसोबत आगामी सार्वत्रिक निवडणुकीच्या तयारीबाबत चर्चा केली.
७३ वर्षीय कर्की यांनी १२ सप्टेंबर रोजी पंतप्रधान पदाची सूत्रे हाती घेतली. माजी पंतप्रधान के. पी. शर्मा ओली यांच्याविरुद्ध झालेल्या भ्रष्टाचारविरोधी आणि सोशल मिडिया बंदीविरोधी जनरेशन Z (Gen Z) चळवळींनंतर त्यांना पदावरून हटवण्यात आले होते. त्यानंतर निर्माण झालेल्या राजकीय अनिश्चिततेला कर्की यांच्या निवडीने पूर्णविराम मिळाला.
कर्की यांच्या शिफारशीनुसार राष्ट्रपती रामचंद्र पौडेल यांनी प्रतिनिधी सभेचे विघटन केले आणि पुढील निवडणुका ५ मार्च रोजी घेण्याची घोषणा केली आहे.
पंतप्रधान कर्की यांनी निवडणूक आयोगाशी चर्चा करताना निवडणूक प्रक्रिया पारदर्शक, शांततेत आणि निष्पक्ष पद्धतीने पार पडावी यावर भर दिला. त्यांनी सांगितले की, “ही निवडणूक केवळ सत्तांतरासाठी नसून, लोकशाहीवरील विश्वास पुनर्स्थापित करण्याची संधी आहे.”
निवडणूक आयोगानेही तयारी सुरु असल्याचे आणि सर्व यंत्रणा योग्य पद्धतीने कार्यरत करण्याचे आश्वासन दिले आहे.
नेपाळमध्ये ही निवडणूक नव्या युगाच्या राजकारणाचा टर्निंग पॉईंट मानली जात आहे, ज्यामध्ये युवकांचा प्रभाव वाढताना दिसत आहे.
