मुंबई, : अमेरिका कडून ईरानमधील अणु केंद्रांवर करण्यात आलेल्या हवाई हल्ल्यानंतर जागतिक पातळीवर कच्च्या तेलाच्या किंमतींमध्ये मोठी वाढ झाली आहे. याचा परिणाम आज सोमवारच्या सुरुवातीच्या सत्रात भारतीय रुपयावर झाला आणि तो १७ पैशांनी घसरून ८६.७२ रुपये प्रति डॉलर या पातळीवर पोहोचला.
विदेशी मुद्रा बाजारातील तज्ज्ञांनी सांगितले की, इतर प्रमुख विदेशी चलनांच्या तुलनेत अमेरिकन डॉलरमध्ये झालेली मजबुती ही भारतीय रुपयावर दबाव टाकणारी ठरली. डॉलरमध्ये स्थैर्य राहिल्यामुळे आयात खर्च वाढण्याची शक्यता आहे, ज्याचा थेट परिणाम रुपयाच्या विनिमय दरावर झाला.
तरीदेखील, परदेशी गुंतवणुकीचा सततचा प्रवाह आणि भारताच्या विदेशी चलन साठ्यात झालेली वाढ यामुळे रुपयाच्या घसरणीवर काही प्रमाणात मर्यादा आली आहे.
आर्थिक विश्लेषकांच्या मते, जागतिक बाजारातील अनिश्चितता, तेलाच्या वाढत्या किंमती आणि भूराजकीय तणाव यांचा परिणाम येत्या काळातही रुपयाच्या स्थितीवर दिसून येऊ शकतो. त्यामुळे भारतीय बाजारपेठा आणि चलन व्यवस्थापनासाठी पुढील काही दिवस अत्यंत निर्णायक ठरणार आहेत
